10.06.2023 Coswig (Anhalt) nach Magdeburg

Wie plant bin am 10i losgfahre. Eigentlich e churzi Tour entlang vo unendliche Felder und Aleee. Aber nüt isch gsi, gli die ersti Umleitig, denn während de Umleitig di nächsti Umleitig und da viermol… Schlussendlich bini uf schmale Strosse Zickzack gfahre und ha öppe 120km statt de guet 80km gmacht :o) Aber bi guet uf em schöne Stellplatz aacho. Bis noch em Mittag einisch ischer denn voll gsi.

Bi schönstem Wetter bini id Stadt. Es isch lut Wetterbricht kei Räge aagseit gsi, nume Sunne. Aber us Erfahrig hani s Fenster über em Bett noe es bitz offe gha – zum Glück! Ha erst d Hälfti vo dem aagluegt gha woni ha welle und scho isch e riese Unwetter cho. Bi denn e Stund noimeds inegsässe und wos chli nocheglo hett bini uf em schnellste Weg hei. Rundumme isches no tief grau gsi, me hett nid gwüsst wenns wider los loht.

Z Obe isch s Wetter wider guet gsi und ich ha mer es feins Restaurant usgsuecht zum ässe. S isch de Hammer gsi!